काठमाडौं : नेपाल इन्भेष्टमेन्ट बैंक र मेगा बैंकबीच मर्जरको लागि शुक्रबार समझदारी पत्रमा हस्ताक्षर भएको छ । समझदारी पत्रमा इन्भेष्टमेन्ट बैंकका अध्यक्ष पृथ्वीबहादुर पाँडे र मेगा बैंकका अध्यक्ष भोजबहादुर शाहले हस्ताक्षर गरेका छन् ।
मर्जरपछि बैंकको नाम नेपाल इन्भेष्टमेन्ट मेगा बैंक लिमिटेड हुनेछ । यस्तै बैंकको अध्यक्षमा नेपाल इन्भेष्टमेन्ट बैंकका अध्यक्ष पाँडे रहनेछन् भने प्रमुख कार्यकारी अधिकृतको जिम्मेवारी इन्भेष्टमेण्ट बैंककै ज्योतिप्रकाश पाण्डेलाई दिने समझादारी छ ।
त्यस्तै डेपुटी प्रमुख कार्यकारी अधिकृतको जिम्मेवारी मेगा बैंककी कायममुकायम प्रमुख कार्यकारी अधिकृत रविना देशराज जोशी हुनेछिन् । असोज मसान्तसम्ममा एकीकृत कारोबार सुरु गर्ने गरी दुवै बैंकले डिडिए, साधारणसभालगायत कामलाई तीव्र बनाउने समझदारीमा उल्लेख छ ।
दुई बैंक मर्जरपछि बन्ने बैंकको चुक्ता पुँजी ३२ अर्ब ८० करोड हुनेछ। हाल नेपाल इन्भेष्टमेन्ट बैंकको १८ अर्ब ३० करोड र मेगा बैंकको १६ अर्ब १२ करोड छ। दोस्रो बजारमा अहिले मेगा बैंकको सेयर मूल्यांकन प्रतिसेयर २२९ रुपैयाँ छ भने, इन्भेष्टमेन्ट बैंकको प्रतिसेयर मूल्यांकन २७५ रुपैयाँ छ।
अघिल्लो हप्ता यी दुई बैंकको मर्जरको हल्लाले मेगा बैंकको सेयरमा सकारात्मक सर्किट लागेको थियो।
प्रतिक्रिया